လိုအပ်ချက်နည်းနည်းနဲ့ ထိရောက်မှုများများ Zinc ဓာတ်
ကျွန်တော် အခုရောက်နေတဲ့ အလုပ်ရုံမှာ အလုပ်လုပ်နေတဲ့ ပအိုဝ့်သူလေးတွေ ၂၀ ယောက်လောက်ရှိပါမယ်။ ကပ်လျက် ပွဲရုံမှာလည်း ၂၀ ယောက်ဝန်းကျင် လောက်ရှိပါမယ်။ အိပ်နားနေချိန်နဲ့ ထမင်းစားချိန်ကလွဲရင် အလုပ်နဲ့လက်မပြတ် တကုပ်ကုပ် လုပ်နေနိုင်တာ ချီးကျူးစရာပါပဲ။ တီးတိုး စကားပြောပြီး ရီနေကြ တာကလွဲလို့ အေးအေးလူလူ အလုပ်လုပ်နေနိုင်ကြပါတယ်။ စကားနည်းနည်း ပြောပြီး အလုပ်များများ လုပ်တဲ့ သဘောပါ။ သူတို့ကို ကြည့်လိုက်ရင် ခြေဆုံးခေါင်းဆုံး ရိုးရာဝတ်စုံ ၀တ်ထားတဲ့အပြင် ခေါင်းမှာလည်း ခေါင်းပေါင်း သဘက်အ၀ါရောင် တောက်တောက်ကို ပေါင်းထားကြပါတယ်။ ပျိုပျို အိုအို အားလုံး တစ်ဆင် တစ်ရောင်ထည်းပါပဲ။ အလုပ်ကိစ္စနဲ့ ကျွန်တော် တောင်ကြီးတက်မယ် ပြောတော့ အလှပြင်ပစ္စည်းတွေ မှာကြတယ်။ မိတ်ကပ်တို့ နှုတ်ခမ်းနီတို့ ရေမွှေးတို့ အပြင် အများဆုံးမှာ တာကတော့ ဗီတာမင် E ဆေးလုံးလေးတွေပါပဲ။ နမူနာယူလာပြတာကတော့ ငယ်ငယ်က သောက်ခဲ့တဲ့ ငါးကြီးဆီလို ဆေးလုံးလေးလိုပါပဲ။ နည်းနည်းတော့ အရွယ်ပိုကြီး ပါတယ်။ နောက်တော့ ထူးထူးခြားခြား မှာတာက ဇင့် (Zinc) ဆေး လို့ ပြောတာပါပဲ။ ကျွန်တော်လည်း တစ်ခါမှ မတွေ့ဖူးတာမို့ တော်တော် မေးဝယ်ခဲ့ ရပါတယ်။ ဘယ်မှာ ဘယ်လို အသုံးဝင်တယ်တော့ မသိပေမယ့် သူတို့ မှာတဲ့ အရေအတွက် အတိုင်းဝယ်ပေးလိုက်ပါတယ်။ ပညာတတ် မြို့သား တစ်ယောက် အနေနဲ့ တောသူတောင်သား တွေလောက် ဗဟုသုတမကြွယ်လို့ ကိုယ့်ကိုယ်ကို ရှက်မိပါတယ်။
လွန်ခဲ့တဲ့ ၈ နှစ်လောက်က ကျိုင်းတုံကနေ တောင်ကြီးအထိကို သူငယ်ချင်းလေးယောက် DT ဆိုင်ကယ် ၂ စီးနဲ့ ခရီးထွက်ခဲ့ဖူးတယ်။ ခုချိန် ပြန်စဉ်းစားမိရင် တစ်ကယ်ကို မိုက်ရူးရဲဆန်ခဲ့ ပါတယ်။ လူငယ်ဘာဝ စွန့်စားတယ် ဆိုပေမယ့် အသက်အန္တရာယ်ကနေ သီသီလေး လွတ်ခဲ့တဲ့ အကြောင်းလေးပါ။ ဆီဆိုင်မြို့ကို ကျော်တော့ ဆိုင်ကယ် ၂စီးကို အရှိန်တင် ယှဉ်မောင်းရင်းလာရာကနေ လမ်းဘေးက နွားကျောင်းသားတစ်ယောက်က လွယ်အိတ်ကိုမြောက်ပြီး လွယ်အိတ်ထဲ ကနေ လုပ်သေနတ်နဲ့ပစ်တာ ကျွန်တော်တို့ လေးယောက်စလုံး ခဲသီးလုံးစတွေ မှန်ကုန်တယ်။ ကျွန်တော်စီးတဲ့ ဆိုင်ကယ်က ဘာမှ မဖြစ်ပေမယ့် နောက်က ဆိုင်ကယ်က စက်ရပ်သွားတယ်။ လုပ်သေနတ်ပေါက်ကွဲသံနဲ့အတူ ထွက်လာတဲ့ ခဲလုံးလေးတွေ အပစ်ခံရပေမယ့် သွေးပူနေတော့ ချက်ချင်းကြီး မနာသေးပါဘူး။ ဆိုင်ကယ်ကို ပြုပြင်ဖို့ထက် ကိုယ်ခန္ဓာနေရာစုံကနေ ထွက်လာတဲ့ သွေးတွေကြောင့် အားလုံးပဲ မှင်သက်သွားပါတယ်။ ဒဏ်ရသိပ်မရတဲ့ တစ်ယောက်က ကောင်းတဲ့ ဆိုင်ကယ်ကိုယူပြီး ဆီဆိုင်မြို့ကိုပြန်ပြီး ကားငှားရတယ်။ ကံကောင်းထောက်မစွာပဲ ဟိုင်းလက်တစ်စီးရတယ်။ အားချင်းပဲ တောင်ကြီးကို မရပ်မနား မောင်းပြီး စ၀်စံထွန်းဆေးရုံတက်တယ်။ တစ်လမ်းလုံးထွက်တဲ့ သွေးကြောင့် ကားတစ်ခုလုံး ချင်းချင်းနီလို့ပါပဲ။ ကြောက်စိတ်ထက် နောက်ဘာဖြစ်လာမယ် ဆိုတာကိုပဲ သိချင်နေမိတယ်။
ဆေးရုံရောက်တော့ ဆေးကုသဖို့ထက် ရဲစခန်းရောက်နေသလို စစ်လားဆေးလား အရင်လုပ်နေလို့ တော်တော် စိတ်ကုန်ဖို့ ကောင်းပါတယ်။ တစ်နေ့လုံး သွေးက ဆက်မထွက် တော့ပေမယ့် ခန္ဓာကိုယ်ထဲမှာ တစ်ခုခုရှိနေသလို ခံစားရတယ်။ နောက်တစ်ရက်မှ ကိုယ်ထဲရောက်နေတဲ့ ခဲလုံးတွေ ခွဲထုတ်ရတယ်။ ကျွန်တော်က ဒူးခေါင်းမှာ ခဲသီး ၂လုံး ပေါင်မှာ ခဲသီး ၄လုံး၊ နံကြားမှာ ခဲသီး ၄လုံး ပေါင်း ၁၀ လုံးပေါက်ပြီး ၀င်သွားတယ်။ ထူထဲတဲ့ ဂျင်းဘောင်းဘီ ၀တ်ထားတယ်၊ နောက် အကျီင်္က သားရေအထူကြီး အောက်မှာ ဆိုင်ကယ်စီးဝတ်တဲ့ ကိုယ်ကြပ်အကျီင်္က ဖော့ပြားတွေကို ဖြတ်ပြီး ခဲသီးစတွေ ၀င်လာတာမို့ အသားထဲ နက်နက် ရှိုင်းရှိုင်း မရောက်ခဲ့ပါဘူး။ လုပ်သေနတ်မို့လို တစ်ခြားတစ်ဖက်ကို ပေါက်ထွက်မသွားပါဘူး။ ခဲသီး ၁၀လုံးမှာ ၆ လုံးပဲခွဲထုတ်နိုင်ပြီး ပေါင်ထဲက ခဲသီး ၂လုံးနဲ့ နံကြားထဲက ၂ လုံးကိုတော့ မထုတ်ယူ နိုင်ခဲ့ပါဘူး။ ဓာတ်မှန်ရိုက်ပေမယ့် ရွေ့နေတာ တွေ့ရပါတယ်။ လုပ်သေနတ်မှာသုံးထားတာက ခဲသီးလုံးတွေအပြင် သွပ်စ (Zinc) တွေလည်း ပါပါတယ်။ ခွဲထုတ်လိုက်တဲ့ အထဲမှာ ခဲသီး ၂ လုံးနဲ့ သွပ်စ ၄ စ ဖြစ်ပါတယ်။ ဆရာဝန်က နက်နက်ရှိုင်းရှိုင်း ၀င်နေတဲ့ ခဲသီးစတွေကို ဆက်မထုတ် ပေးတော့ပါဘူး။ ခုချိန်ထိ ရာသီဥတုအေးရင် ခဲဆိပ်တက်လို့ ကိုက်နေတုန်းပါပဲ။ လူကြီးတွေ မသိဘဲ ခရီးထွက်လို့ ရခဲ့တဲ့ သင်ခန်းစာပါ။ ခွဲစိတ်လိုက်တဲ့ အနာတွေ ပုံမှန် နေသားကျအောင် စ၀်စံထွန်းဆေးရုံမှာ ၂ လကျော်ကြာ တက်ခဲ့ရပါတယ်။
ကျွန်တော်ပြောချင်တဲ့ သွပ်ဓာတ် Zinc က လုပ်သေနတ်ကပေးတဲ့ အသိမဟုတ်ပါဘူး။ ဆေးပညာက ပေးတဲ့ အသိပညာပါ။ ခုဆိုရင် Zinc ဓာတ်ပါဝင်တဲ့ ဆေးတွေ အလှကုန်ပစ္စည်းတွေ ဈေးကွက်မှာ နေရာကဏ္ဍတစ်ခုနဲ့ အထင်ကရ ပေါ်ထွက်လာပြီး နေရာရလာတာပါပဲ ဖြစ်ပါတယ်။ အသားအရေ ကျစ်လျစ်ပြီး ကြည်လင်ဖို့နဲ့ ဆံပင်ကျွတ်ရာကနေ ကင်းဝေးစေပြီး ဆံပင် နက်နက်ထူထူလေးဖြစ်စေဖို့ သွပ်ဓာတ် လိုအပ်တယ်လို့ အကြမ်းဖျဉ်း သိရပါတယ်။
ကျွန်တော်တို့ လူသားတွေအနေနဲ့ ကိုယ်ခန္ဓာအတွက် သွပ်ဓာတ်လိုအပ်ချက်က နည်းနည်းလေး ဖြစ်လို့ သွပ်ကို Trace Element လို့ပဲ ခေါ်ပါတယ်။ တစ်ကယ်တော့ သွပ်ဟာ Mineral အုပ်စုဝင် ဖြစ်ပါတယ်။ တစ်နေ့တာ လိုအပ်တဲ့ ပမာဏက မဆိုစလောက်နည်းနည်းလေးမို့ Trace Elememt ရယ်လို့ပဲ အမှတ်သညာ ပြုခဲ့တာပါ။ လူကြီးတစ်ယောက် တစ်ကိုယ်လုံးကို စစ်စစ်ပေါက်ပေါက် ရှာကြည့်ပါမှ သွပ်ဓာတ်ပမာဏက (၂)ဂရမ် ဒါမှမဟုတ် (၃)ဂရမ် လောက်ပဲ ရှိပါတယ်။ ခန္ဓာကိုယ်ရဲ့ အရိုး၊ အကြော၊ အဆစ်၊ ကြွက်သားမျှင် ထဲမှာ သွပ်ပမာဏ အများအပြားရှိပြီး၊ အနည်းအကျဉ်းကတော့ ခန္ဓာကိုယ်ရဲ့ ကိုယ်တွင်းအင်္ဂါ၊ ဆံကေသာ၊ ခြေသည်း လက်သည်း များထဲမှာ ပျံ့နှံ့ပြီး တည်ရှိနေပါတယ်။
သွပ်ဓာတ်ဟာ ခန္ဓာကိုယ်အတွက် အထိုက်အလျှောက် အရေးကြီးပါတယ်။ ပမာဏလေးက မဆိုစလောက်ပေမယ့် ခန္ဓာကိုယ်ရဲ့ ဇီဝကမ္မဗေဒ လုပ်ငန်း ဆောင်တာ များမှာလိုအပ်တဲ့ အင်ဇိုင်းတွေမှာ သွပ်ဓာတ်ပါဝင် နေတဲ့အတွက်ဖြစ်ပါတယ်။ သွပ်ဓာတ်ရှိမှသာ ဖြစ်တည်နိုင်တဲ့ အင်ဇိုင်းတွေဟာ ခန္ဓာကိုယ်အတွက် စွမ်းအင် (Energy) ရဖို့ ကစီဓာတ်ကို ဖြိုခွင်းခြင်းမှာ ဖြစ်ပါတယ်။ အာရုံခံကြောများအတွက် လိုအပ်တဲ့ ဓာတ်ပစ္စည်းများထဲမှာ သွပ်ဓာတ်က ပါဝင်ရပြန်ပါတယ်။ ဒါကြောင့် သွပ်ဓာတ်ချို့တဲ့ရင် အာရုံကြောပိုင်းဆိုင်ရာ ထုံကျဉ်နာတာ ဖြစ်တတ်ပါတယ်။ ကလေးတွေမှာ သွပ်ဓာတ်ချို့တဲ့ရင် ခန္ဓာကိုယ် ကြီးထွားမှုကို သိသိသာသာ ယုတ်လျော့သွား နိုင်ပါတယ်။ အရပ်မထွက်တဲ့အပြင် လိင်မှုဆိုင်ရာ ဖွံ့ဖြိုးမှုပါ မရှိတော့ပါဘူး။ လူကြီးတွေအတွက်တော့ နှလုံးမှာ အားနည်းပြီး အင်မတန် ပင်ပန်း နွမ်းနှယ်တတ်ပါတယ်။ အာရုံခံစားနိုင်မှု နည်းပါးပါတယ်။ အရေးကြီးတာကတော့ ဦးရေပြားမှာ ရောဂါဖြစ်ပြီး ဆံပင်တွေ အဆုပ်လိုက် ကျွတ်ထွက်တတ်ပါတယ်။ ဆံပင်ကျွတ်ပြီး ပြန်မပေါက်တော့ဘဲ ထိပ်ပြောင်နေတတ်ပါတယ်။ ဆံပင်တွေ ခြောက်ကပ် ကွဲအက်ပြီး အရောင်ဖျော့နေတတ်ပါတယ်။ နီကျင်မယ်။ အရေပြားမှာ ထိခိုက်သွားနိုင်တဲ့အတွက် အကွက်တွေပေါ်ပြီး မလှမပ ဖြစ်ပါမယ်။ သားသမီးရဖို့ ရာမှာလည်း အခက်အခဲတွေ့ကြုံရတတ်ကြောင်း လေ့လာတွေ့ရှိရပါတယ်။
သွပ်ဓာတ်ချို့တဲ့မှု မဖြစ်ဖို့အတွက် ဆေးစား ဆေးသောက်တာထက် အစားအစာ စားတတ်ဖို့ ပိုပြီး အရေးကြီးပါတယ်။ ပင်လယ်ရေထွက် အစားအစာတွေ ဖြစ်တဲ့ ပုဇွန်၊ ဂဏန်း၊ ပင်လယ်ငါး၊ ကမာ၊ ဂုံးကောင်တွေထဲမှာ သွပ်ဓာတ်အများကြီး ပါဝင်ပါတယ်။ နောက် လွယ်လွယ်ကူကူ ရနိုင်တာကတော့ နွားနို့ပဲဖြစ်ပါတယ်။ နောက် မြေပဲ၊ သစ်ကြားသီး၊ ကြက်ဥ စတာတွေမှာလည်း သွပ်ဓာတ်ပါဝင်ပါတယ်။ ကိုယ်ဝန်ဆောင် မိခင်များအနေနဲ့ အခြေအနေအရ သွပ်ဓာတ်ပါဝင်တဲ့ ဆေးကို စားသုံးပေး ရပါတယ်။ တစ်ခု သတိပြုရမှာက သွပ်ဓာတ်ကို မလိုအပ်ပါဘဲ ပိုမို စားသုံးမိရင် ပျို့အန်တတ်ပါတယ်။ အသက်အန္တရာယ်တော့ မရှိနိုင်ပါဘူး။
သည်ကနေ့ ဈေးကွက်ထဲမှာ အလှအပအတွက် Zinc ခေါ် သွပ်ဓာတ်ကို မှီဝဲဖို့ တိုက်တွန်းတဲ့ ဆေးကြော်ငြာတွေ၊ ခေါင်းလျှော်ရည်ကြော်ငြာတွေ ပလူပျံနေပါတယ်။ လှပချင်တဲ့ ပျိုမေညီမငယ်တွေ ကလည်း လှပမယ်၊ နုပျိုမယ်ဆိုရင် စမ်းသုံးကြည့်ဖို့ ၀န်မလေးကြပါဘူး။ ဒါကြောင့် သွပ်ဓာတ်ဆိုင်ရာ ဗဟုသုတရှိအောင် လေ့လာ ကြည့်ပြီးမှသာ ဘာတွေ လုပ်ရင် မကောင်းမလဲ၊ ဘာလုပ်သင့်သလဲဆိုတာ ဆုံးဖြတ်ကြစေချင်ပြီး၊ ဒီနေရာမှာ ပိုမို နားလည်တဲ့ ဆေးပညာရှင်တွေ အနေနဲ့ ဗဟုသုတ အလို့ငှာ ဖြည့်စွက် အကြံပြုစေချင်ပါတယ်။
Ref: winzaw-mdy.blogspot
