ထမင်းကြော်နည်းကိုတော့ http://lulucooking.blogspot.com/2008/01/blog-post_19.html မှာ တစ်ခါ ရေးဖူးပါတယ်နော်။
ထမင်းကြော်ဖို့အတွက် လိုအပ်တာကတော့
ချက်ပြီးသား ထမင်း၊ ကြက်သား၊ ဘိုစားပဲ၊ မုန်လာဥနီ၊ ကြက်သွန်နီ၊ ကြက်သွန်မြိတ်၊ ပဲငံပြာရည်အကြည်၊ သကြား၊ ဆား၊ ဟင်းခတ်မှုန့်၊ တရုတ်မဆလာ၊ ကြက်ဥတစ်လုံးနဲ့ ဆီတို့ပါနော်။
ထမင်းကို အတုံးလိုက်ဖြစ်မနေဘဲ ပွပွလေးဖြစ်အောင် မွထားပေးပါနော်။
ကြက်သားကို ရေစင်အောင်ဆေး ပါးပါးလေးတွေလှီးပြီး ဆား၊ သကြား၊ ပဲငံပြာရည်အကြည်၊ ဟင်းခတ်မှုန့်တို့နဲ့ နယ်ပေးထားပါ။
မုန်လာဥနီကို အခွံနွှာ၊ ရေစင်အောင်ဆေးပြီး သေးသေးနုတ်နုတ်လေးတွေဖြစ်အောင် လှီးပေး ထားပါ။
ဘိုစားပဲကိုလည်း ရေစင်အောင်ဆေးပြီး ပါးပါးလေးတွေဖြစ်အောင် လှီးပေးထားပါနော်။
ကြက်သွန်နီကို အခွံနွှာ၊ ရေဆေးပြီး မထူမပါးလေး လှီးပေးထားပါနော်။
ကြက်သွန်မြိတ်ကိုလည်း ရေဆေး၊ ရေစင်အောင်ခါပြီးတော့ ခပ်ပါးပါးလေး လှီးပေးထားပါနော်။ ကြက်ဥကိုလည်းဆားလေးနည်းနည်းတရုတ်မာဆလာလေးနည်းနည်းနဲ့ သေသေချာချာ ခေါက်ပေး
ထားပါနော်။
အားလုံးအသင့်ဖြစ်ပြီဆိုရင်တော့ မီးဖိုပေါ် ဒယ်အိုးတင်၊ ဒယ်အိုးပူလာရင် ဆီနည်းနည်းထည့်၊ ဆီပူလာပြီဆိုတာနဲ့ ကြက်သွန်နီကို ထည့်ပြီး ဆီသတ်ပါ။
ကြက်သွန်နီစိမ်းနံ့ပျောက်ပြီး နွမ်းလာပြီဆိုတာနဲ့ ကြက်သားကိုထည့်ပြီး ဆီသတ်ပါ။
ကြက်သားနူးလောက်ပြီဆိုရင် လှီးထားတဲ့ မုန်လာဥနီကိုထည့်ပြီး ကြော်ပေးပါ။
မုန်လာဥနီ ကျက်ခါနီးလောက်မှာ လှီးထားတဲ့ ဘိုစားပဲကိုထည့်ပြီး ခပ်မြန်မြန်လေး ကြော်ပေးပါ။
တဆက်တည်းဆိုသလို ခေါက်ထားတဲ့ ကြက်ဥကိုလည်း ထည့်ကြော်ပေးပါ။
ကြက်ဥကျက်တာနဲ့ တပြိုင်နက် ထမင်းကိုထည့်ပြီး အသီးအနှံအသားတွေနဲ့ထမင်းကို နှံ့အောင် မွှေပေးပါ။
မီးပြင်းပြင်းလေးနဲ့ ခပ်မြန်မြန်လေးမွှေပြီး ကြော်ပေးပါ။
ထမင်းသား လေးတွေ ခပ်တောင့်တောင့်ဖြစ်လာတာနဲ့ အပေါ့အငံကိုမြည်းပါ။
အရသာ စိတ်ကြိုက်ဖြစ်ပြီဆိုတာနဲ့ ပါးပါးလှီးထားတဲ့ တရုတ်နံနံပင်လေးတွေကိုအုပ်ပြီး မွှေပေးလိုက်ပါနော်။
အဲ့ဒါဆိုရင်တော့ အနံ့အရသာနဲ့ ပြည့်စုံလှတဲ့ ထမင်းကြော်လေး ရပါပြီနော်။
လိုအပ်တဲ့ပစ္စည်းတွေကတော့
ကျောက်ပွင့်၊ ကြက်သားရင်အုံသား၊ ကြက်သွန်ဖြူ၊ နီ၊ ဂျင်း၊ငရုတ်သီးစိမ်း၊သံပုရာသီး၊ ဆား၊ အချိုမှုန့်၊ ငံပြာရည်၊သကြားတို့ပါနော်။
ကျောက်ပွင့်ကို ရေနဲ့ ၁၀ မိနစ်လောက် စိမ်ထားလိုက်ပြီးတော့မှ ရေနွေးပွက်ပွက်ဆူထဲကို ၃ မိနစ်လောက် ပြုတ်လိုက်ပါတယ်။
ကျောက်ပွင့်သား ပိုပွလာအောင်ရယ်၊ စားလို့ ပိုကောင်းအောင်ရယ်ပေါ့နော်။
ပြီးရင် ကျောက်ပွင့်တွေကို ဆယ်ယူပြီးတော့ ရေခဲရေထဲ စိမ်ထား၊ ပြီးတော့မှ အနေတော်လေးတွေ ရအောင် ကပ်ကြေးလေးနဲ့ ညှပ်ယူပေါ့နော်။
ကြက်သားကိုလဲ ရေစပ်စပ်လေးနဲ့ ဆား၊ သကြား၊ ငံပြာရည်၊ အချိုမှုန့်၊ သကြားလေး နည်းနည်းထည့်ပြီးပြုတ်ထားလိုက်ပါတယ်။
စစချင်း ကြက်သားထဲက ထွက်လာတဲ့ ရေခမ်းသွားအောင် အရင်တည်ပေးပါနော်။
ပြီးတော့မှ ရေကို နည်းနည်းချင်းစီထည့်ပြီး ရေလည်းခမ်း ကြက်သားလည်းနူးတဲ့အထိ ပြုတ်ပေးပါနော်။
ပြီးရင် ကြက်သားတွေကို အအေးခံပြီး အရွယ်တော်လေးတွေ ရအောင် လှီးထားပေးပါနော်။
ပြီးတော့ ကြက်သွန်ဖြူကို အခွံနွှာပြီး နုတ်နုတ်စင်းထားလိုက်တယ်။ ငရုတ်သီးတောင့်ကို အညှာချွေရေဆေးပြီး ရေနွေးပွက်ပွက်ဆူထဲ ဆားနည်းနည်းခပ်ပြီး ငရုတ်သီးတောင့်တွေ ထည့်လိုက်ပါနော်။ တစ်မိနစ်လောက် ကြာရင် ငရုတ်သီးတောင့်တွေကို ပြန်ဆယ်လိုက်ပါ နော်။ (ရေနွေးနဲ့ ပြုတ်လိုက်သလိုလုပ်တာပါ၊ ဆားထည့်လိုက်တဲ့အတွက် ငရုတ်သီးတောင့် အရောင်စိမ်းတာ မပျက်တော့ဘူးလေနော့်)။ ပြီးတော့မှ ငရုတ်သီးစိမ်းတွေကို မညက်တညက်လေး ထောင်းပါနော်။
အားလုံးအသင့်ဖြစ်ပြီဆိုရင်တော့ ကျောက်ပွင့်ရယ်၊ ကြက်သားရယ်၊ ငရုတ်သီးစိမ်းနဲ့ ကြက်သွန်ဖြူထောင်း၊ ဆား၊ သကြား၊ ငံပြာရည်၊ ဟင်းခပ်မှုန့်အနည်းငယ်၊ သံပုရာရည်လေး ညှစ်ထည့်ပြီးတော့ သမအောင် မွှေပေးပါ။
အရသာက ချိုချဉ်ငံစပ် လေးပါနော်။ ကိုယ်နှစ်သက်တဲ့အရသာဘက်ကို ကဲပြီးထည့်နော်။
ဒါဆိုရင်တော့ အနံ့အရသာနဲ့ ပြည့်စုံလှတဲ့ ကြက်သားကျောက်ပွင့်သုပ်လေး ရပါပြီနော်။
ဆေးဘဲဥသုပ်အတွက် လိုအပ်တဲ့ပစ္စည်းတွေကတော့
ဆေးဘဲဥ၊ ကြက်သွန်ဖြူ၊ ငရုတ်သီးစိမ်း၊ ပဲငံပြာရည်အပျစ်၊ ပဲငံပြာရည်အကျဲ၊ ဆား၊ သကြား၊ တရုတ်နံနံနဲ့ သံပရာသီးတို့ပါနော်။
ဆေးဘဲဥကို အခွံနွှာပြီး အစိပ်လေးတွေ စိပ်လိုက်ပါနော်။ ငရုတ်သီးစိမ်း၊ ကြက်သွန်ဖြူနဲ့ တရုတ်နံနံအရိုးတို့ကို မညက်တညက် ထုထောင်းပြီး ရလာတဲ့ paste ကို သီးသန့်ဖယ်ထားပါ။
ပြီးရင် ပန်းကန်လုံးလေးတစ်ခုထဲကို ဆားအနည်းငယ်၊ သကြားအနည်းငယ်၊ ပဲငံပြာရည်အပျစ်အကျဲ နှစ်မျိုးလုံးကို ရေနွေးလေးနဲ့ စပ်ဖျော်ပြီး အဲ့ဒီအထဲကို ခုနက ထောင်းထားတဲ့အနှစ်လေးကို ထည့်လိုက်ပါနော်။
ပြီးတော့ သံပရာရည်ရွှဲရွှဲလေးညှစ်ပြီးတော့ ဆေးဘဲဥတွေကို အစိတ်လေးတွေ လုပ်ထားတဲ့ ပန်းကန်ထဲ ထည့်ပြီး ရောမွှေလိုက်ပါနော်။
အဲ့ဒါဆိုရင်တော့ ချဉ်စပ်အရသာနဲ့ ဆေးဘဲဥသုပ်လေး ရပါပြီနော်။
ငါးဖယ်လုံးမုန်ညင်းဟင်းချိုကတော့ ငါးဖယ်ကို ချင်း၊ ဆားအနည်းငယ်၊
သကြားအနည်းငယ်ထည့်ပြီး ထောင်းပါ။ ပြီးရင် အလုံးလေးတွေရအောင် လုံးပေးထားပါ။
မုန်ညင်းစိမ်းကိုလည်း ရေစင်အောင်ဆေးပြီး နှစ်လက်မအရွယ်လေးတွေ ဖြတ်ထားပေးပါ။
အားလုံးအသင့်ဖြစ်ရင် အိုးတစ်လုံးထဲ ရေထည့်၊ ဆား၊ ဟင်းခတ်မှုန့်အနည်းငယ်ထည့်ပြီး မီးဖိုပေါ်တင်ပြီး ပွက်ပွက်ဆူအောင် တည်ပေး ပါ။
ဟင်းရည်အိုးဆူရင် ကြက်သွန်ဖြူ ဓားပြား ရိုက်ထည့်၊ ဆူအောင်ထပ်တည်၊ ပီးရင် ငါးဖယ်လုံးထည့်ပါ၊ ငါးဖယ်လုံးလေးတွေက ကျက်ပြီဆိုရင် ဟင်းချိုအိုးအပေါ်ကို တက်လာတာကိုတွေ့ရမယ်နော်။
ပြီးရင် မုန်ညင်းစိမ်းကိုထည့်ပြီး ဆူအောင် ထပ်တည်၊ အပေါ့အငံ အရသာကို မြည်းပါ။
အရသာ ကြိုက်ပြီဆိုရင်တော့ ငါးဖယ်လုံး မုန်ညင်းစိမ်းလေးနဲ့ ဟင်းချိုပူပူမွှေးမွှေးလေး ရပါပြီနော်။ စားခါနီးကျ ငရုတ်ကောင်းမှုန့်လေး ခပ်သောက်ပေါ့နော်။
မြန်မာထမင်းဟင်း စားရတာ တစ်ခါတလေရိုးအီသွားတဲ့အခါ ဖြစ်ဖြစ်၊ သူငယ်ချင်းတွေ စုံလို့၊ မိသားစုတွေ ပိတ်ရက်မှာ အားလို့ တစ်ယောက်တစ်လက် ၀ိုင်းဝန်းကူညီပြီး ချက်ပြုတ်ကြမယ်ဆိုရင်တော့ အခုလို ထမင်းကြော်၊ အသုပ်လေးနဲ့ ဟင်းချိုလေးနဲ့ တွဲဖက်ပြီး ချက်ပြုတ် စားသောက်ကြည့်ကြပါဦးနော်။
